பிரபல நகைச்சுவை நடிகர் கவுண்டமணி உடல்நலக் குறைவு காரணமாக மருத்துவமனையில் அனுமதிக்கப்பட்டுள்ளார். சுமார் 400 படங்களுக்கு மேல் நடித்துள்ள நடிகர் கவுண்டமணி. "கவுண்டமணிக்கு இதய நோய் சம்பந்தமாக சிகிச்சை அளிக்கப்பட்டு வருகிறது. அவர் நல்ல உடல்நலத்துடன் இருக்கிறார். ஓரிரு நாளில் வீடு திரும்புவார்' என மருத்துவர்கள் தெரிவித்தனர். இதற்கிடையில் கவுண்டமணி இறந்துவிட்டதாக இணையங்களில் செய்திகள் பரவின. திரையுலக வட்டாரமே குழப்பத்தில் இருக்கும் நிலையில் கவுண்டமணியின் மகள் செல்வி பத்திரிகையாளர்களுக்கு அனுப்பிய செய்தியில் அவர் நலமாக இருப்பதாகவும், இன்று இருதய அறுவை சிகிச்சை நடக்கவுள்ளதாகவும், ஓரிரு நாட்களில் நலமுடன் வீடு திரும்ப இருப்பதாகவும் தெரிவித்துள்ளார். கவுண்டமணிக்கு சர்க்கரை நோய் இருந்தது. சில வருடங்களுக்கு முன், மஞ்சள் காமாலை நோயினாலும் பாதிக்கப்பட்டார். அதன்பிறகு அவர் படங்களில் நடிப்பதை குறைத்துக்கொண்டார். நீண்ட இடைவெளிக்குப்பின், சரத்குமார் நடித்து சமீபத்தில் திரைக்கு வந்த `ஜக்குபாய்' படத்தில் நடித்து இருந்தார். கவுண்டமணிக்கு கடந்த சில நாட்களாக தோள்பட்டையிலும், கழுத்திலும் பயங்கர வலி இருந்து வந்தது. இதற்காக அவர் கழுத்து பட்டை அணிந்து இருந்தார். கடந்த 15-ந் தேதி அவருக்கு திடீர் மூச்சுத்திணறல் ஏற்பட்டது. உடனடியாக அவரை சென்னையில் உள்ள ஒரு தனியார் மருத்துவமனையில் சேர்த்தார்கள். அங்கு அவரை பரிசோதித்த டாக்டர்கள், கவுண்டமணிக்கு லேசான மாரடைப்பு ஏற்பட்டிருப்பதை கண்டுபிடித்தனர். இதற்காக, அவருக்கு தீவிர சிகிச்சை அளிக்கப்பட்டது. நேற்று அவருக்கு முழு உடல் பரிசோதனை நடந்தது. அதைத்தொடர்ந்து கவுண்டமணிக்கு `இருதய ஆபரேஷன்' நடத்த டாக்டர்கள் முடிவு செய்தார்கள். அதன்படி அவருக்கு, இன்று (வெள்ளிக்கிழமை) `ஆபரேஷன்' நடக்கிறது.

Last update : 19-03-2010 05:19

Average user rating

   (0 vote)