தெலுங்கானா மாநிலம் அமைப்பது என்று மத்திய அரசு அறிவித்ததைத் தொடர்ந்து, ஆந்திர மாநிலத்தில் நீடித்து வரும் அரசியல் நெருக்கடிக்கு மத்தியில், நடிகரும், பிரஜா ராஜ்யம் கட்சித் தலைவருமான சிரஞ்சீவி தனது சட்டசபை உறுப்பினர் பதவியை ராஜினாமா செய்துள்ளார்.

ஒன்றுபட்ட ஆந்திராவிற்காக போராடப் போவதாக ராஜினாமா கடிதத்தில் பத்திரிகையாளர்கள் முன்னிலையில் கையெழுத்திட்ட பின் அளித்த பேட்டியில் தெரிவித்தார். தமது பதவி விலகல் கடிதத்தை சட்டசபை சபாநாயகர் கிரண் குமார் ரெட்டியிடம் தமது கட்சி எம்.எல்.ஏ. மூலமாக அனுப்பவிருப்பதாக அவர் கூறினார்.

தெலுங்கானா பகுதியில் சுற்றுப்பயணம் செய்து, ஒன்றுபட்ட ஆந்திராவில் அப்பகுதி மக்களுக்கு கிடைக்கும் நன்மை குறித்து எடுத்துக் கூறப்போவதாகவும் சிரஞ்சீவி குறிப்பிட்டார். தமது சுற்றுப்பயணத்திற்கு அதிக எதிர்ப்பு இருக்கக்கூடும் என்றாலும், தாம் ஒன்றுபட்ட ஆந்திர மாநிலத்திற்காக போராடப் போவதாகவும் அவர் கூறினார்.

சிரஞ்சீவியின் அறிவிப்பைத் தொடர்ந்து தெலுங்கானா ராஷ்டிரிய சமிதி கட்சித் தொண்டர்கள், பிரஜா ராஜ்யம் கட்சி அலுவலகத்திற்கு வெளியே போராட்டத்தில் ஈடுபட்டனர். அவர்களை கலைந்து போகுமாறு காவல்துறையினர் கூறினர். சிலர் கைது செய்யப்பட்டிருப்பதாகவும் தகவல்கள் தெரிவிக்கின்றன. பிரஜா ராஜ்யம் கட்சியைச் சேர்ந்த அனைத்து 18 எம்.எல்.ஏ.க்களும் தெலுங்கானா மாநிலம் அமைவதற்கு எதிர்ப்பு தெரிவித்து ராஜினாமா செய்திருப்பது குறிப்பிடத்தக்கது.



Courtesy : Webdunia

Last update : 17-12-2009 11:53

Average user rating

   (0 vote)