ஊட்டி மற்றும் நீலகிரி மாவட்டத்தின் பெரும்பாலான பகுதிகளில் பலத்த மழை பெய்து வருவதால் சுற்றுலா பயணிகள் ஊட்டிக்கு வர வேண்டாம் என்று அந்த மாவட்ட கலெக்டர் ஆனந்த் பாட்டில் கேட்டுக் கொண்டுள்ளார். ஊட்டி, குன்னூர் பகுதிகளில் பெய்த கன பலத்த மழையால் ஆங்காங்கே சாலையில் மரங்கள் சரிந்துள்ளன. நிலச்சரிவு காரணமாக ஊட்டி-மேட்டுப்பாளையம் சாலை முழுவதுமாக பாதிக்கப்பட்டுள்ளது. இந்த சாலையை சீர் செய்ய சில நாட்கள் ஆகும்.

இதனால் போக்குவரத்து அனைத்தும் கோத்தகிரி சாலை வழியாகத்தான் நடந்து வருகிறது. அவசர உதவிகளுக்கு மஞ்சூர், கெத்தை, காரமடை சாலையை பயன்படுத்தவும் நடவடிக்கை எடுக்கப்பட்டுள்ளது. தொடர்ந்து மழை பெய்து வருவதால் சுற்றுலாப் பயணிகள் ஊட்டிக்கு வருவதை தவிர்க்கும்படி கேட்டுக் கொள்ளப்படுகிறார்கள் என்றார்.

நிலச்சரிவு பலி 36 ஆனது

இதற்கிடையே நீலகிரி மாவட்டத்தில் ஊட்டி உள்ளிட்ட இடங்களில் கன மழையாலும், நிலச்சரிவுகளாலும் வீடுகள் இடிந்து விழுந்ததில் பலியானவர்கள் எண்ணிக்கை 36 ஆக உயர்ந்துள்ளது. பல்வேறு இடங்களில் இதுவரை 16 உடல்கள் மீட்கப்பட்டுள்ளன. மேலும் உடல்களைத் தேடும் பணி நடந்து வருகிறது.

நீலகிரி-பெரம்பலூர் பள்ளி-கல்லூரிகளுக்கு விடுமுறை

இந்நிலையில் தொடர்ந்து பெய்து வரும் கனமழை காரணமாக நீலகிரி, பெரம்பலூர் மாவட்டங்களுக்கு பள்ளி மற்றும் கல்லூரிகளுக்கு விடுமுறை அளிக்கப்பட்டுள்ளதாக அந்த மாவட்டங்களின் கலெக்டர்கள் அறிவித்துள்ளனர்.
TNC

Last update : 10-11-2009 09:46

Average user rating

   (0 vote)