இடம்பெயர்ந்த மக்களை மீண்டும் குடியமர்த்துவதில் பாகிஸ்தானை விட இலங்கை பின்னிலையில் உள்ளது - யுத்தத்தால் இடம்பெயர்ந்த மக்களை மீள குடியமர்த்துவதில், பாகிஸ்தானை விட இலங்கை பின்னிலையில் இருப்பதாக கருத்துக்கள் வெளிவந்துள்ளன. தலிபானியர்களுக்கு எதிராக மேற்கு வசிரிஸ்தானில் இடம்பெற்று வரும் யுத்தம், இலங்கையின் வடக்கில் தமிழீழ விடுதலைப் புலிகளுக்கு எதிரான யுத்தத்துக்கு ஒப்பாக கருதப்படுகிறது. எனினும், பாகிஸ்தானில் இந்த யுத்தம் காரணமாக, சுமார் 2 மில்லியன் மக்கள் இடம்பெயர்ந்துள்ளதாக தகவல்கள் தெரிவிக்கின்றன.

எனினும், இடம்பெயர்ந்த 2 மில்லியன் மக்களில், 765 ஆயிரம் பேர் தமது சொந்த இடங்களிலேயே மீள குடியமர்ந்துள்ளதாக தெரிவிக்கப்பட்டுள்ளது. பாகிஸ்தானில் இடம்பெயர்ந்தவர்களில், நாளொன்றுக்கு சுமார் 1500 பேர், தமது சொந்த இடங்களில் மீள குடியமருவதாக தெரிவிக்கப்பட்டுள்ளது.

இலங்கையில் தமிழீழ விடுதலைப் புலிகளுக்கு எதிரான யுத்தம் தீவிரமடையும் தருணத்திலேயே பாகிஸ்தானிலும் தலிபானியர்களுக்கு எதிரான யுத்தம் தீவிரமாக முன்னெடுக்கப்பட்டது. இந்த காலகட்டத்திலேயே இரண்டு நாடுகளிலும் லட்சக்கணக்கான பொது மக்கள் இடம்பெயர்ந்து முகாம்களில் தங்க வைக்கப்பட்டனர்.

இந்த நிலையில், தமிழீழ விடுதலைப் புலிகள் முற்றாக தோற்கடிக்கப்பட்டு விட்டதாக அரசாங்கம் அறிவித்து 3 மாதங்கள் நிறைவடைந்துள்ளது. எனினும், இலங்கையை பொறுத்தவரையில் இடம்பெயர்ந்து முகாம்களில் உள்ள சுமார் 300,000 மக்களுள் இதுவரையில் மொத்தமாக 3068 பேரே மீள குடியமர்த்தப்பட்டுள்ளனர்.

இலங்கையில் இடம்பெயர்ந்தவர்களை விட பாகிஸ்தானில் இடம்பெயர்ந்தவர்களின் எண்ணிக்கை மிக அதிகம், எனினும் அவர்களை முகாம்களில் இருந்து வெளியேற அனுமதித்து மீள குடியமர்த்துவதில் முன்னிலையில் உள்ளது. எனினும், இலங்கையில் 3 லட்சம் மக்கள் இடம்பெயர்ந்துள்ள நிலையில், அவர்களை முகாம்களில் அடைத்து வைத்து, அரசாங்கம் சர்வதேசத்திற்கு வேடிக்கை காட்டுகிறது.

இதேவேளை பாகிஸ்தானில் தலிபானியர்கள் முற்றாக அழிக்கப்பட்டு விட்டனர் என்ற அறிவிப்பை பாகிஸ்தான் அரசாங்கம் இதுவரையில் விடுக்கவில்லை. அவர்கள் தலிபானியார்களின் கட்டுப்பாட்டில் இருந்து பிரதேசங்களை மீட்டு, அங்கு உடனடியாக சோதனைகளை மேற்கொண்டதன் பின்னர் மீள் குடியேற்றங்களை செய்துள்ளனர்.

ஆனால் இலங்கை அரசாங்கம் விடுதலைப் புலிகளின் தோற்கடிக்கப்பட்டுவிட்டதாக அறிவிக்கப்பட்டபின்னரும் பொது மக்களை தடுத்து வைத்துள்ளது. இதேவேளை பாகிஸ்தானின் 6 இடைத்தங்கல் முகாம்கள், அங்கிருந்து மக்கள் அனைவரும் குடியமர்த்தப்பட்டு முற்றாக மூடப்பட்டுள்ளதாக தெரிவிக்கப்பட்டுள்ளது.
TNC

Last update : 25-08-2009 20:30

Average user rating

   (0 vote)