பெங்களூரில் திருவள்ளுவர் சிலை திறக்கப்பட்டதன் மூலம், தமிழக-கர்நாடக உறவு வலுப்படும் என்று, மதுரை ஆதீனம் கூறினார். வேலூர் மாவட்டம் நெமிலியில் உள்ள வீரபத்திர சாமி கோவிலில் 5-வது ஆண்டு நிறைவு விழா, அன்னதான அறக்கட்டளை தொடக்க விழா, 5-வது ஆண்டு நிறைவு விழா மலர் வெளியீட்டு விழா ஆகிய முப்பெரும் விழா நேற்று நடந்தது. விழாவிற்கு டாக்டர் கண்ணப்பன் தலைமை தாங்கினார்.

விழாவில் சிறப்பு அழைப்பாளராக, மதுரை ஆதீனம் கலந்து கொண்டு பேசினார். அதன்பின்னர் அவர் நிருபர்களுக்கு அளித்த பேட்டியின்போது கூறியதாவது : தமிழக கோவில்களுக்கு சொந்தமாக பல கோடி ரூபாய் மதிப்புள்ள நிலங்கள் உள்ளன. ஆனால், அவற்றில் இருந்து வருமானம் வராத நிலை நிலவுகிறது. எனவே, குத்தகை மற்றும் வாடகை பாக்கியை உடனடியாக வசூலிப்பதற்கு அரசு உரிய நடவடிக்கைகளை மேற்கொள்ள வேண்டும். கோவில்களில் பெண் அர்ச்சகர்களை நியமிப்பது, மரபிற்கு எதிரானது.

பெங்களூரில் திருவள்ளுவர் சிலையை தமிழக முதல்-அமைச்சர் கருணாநிதி திறந்து வைத்துள்ளார். இதன்மூலம், தமிழக- கர்நாடக மாநிலங்களுக்கு இடையே உள்ள உறவு வலுப்படும்.

புதிதாக கோவில்களை கட்டி கும்பாபிஷேகம் நடத்துவதைக்காட்டிலும், பாடல் பெற்ற கோவில்களை புதுப் பித்து கும்பாபிஷேகம் நடத்துவது சிறப்பானதாகும்.

இலங்கையில் உள்ள ஈழத்தமிழர்களை சந்திப்பதற்காக தமிழகத்தை சேர்ந்த சில ஆன்மீக தலைவர்கள் சென்றுள்ளனர். இது வரவேற்கத்தக்கது.  இவ்வாறு மதுரை ஆதீனம் கூறினார்.
TNC

Last update : 10-08-2009 21:10

Average user rating

   (0 vote)