வடபகுதியில் நடைபெற்ற உள்ளூராட்சி சபைகளுக்கான தேர்தல் பிரச்சார நடவடிக்கைகளின்போது அனைத்து மட்டங்களிலும் அரசின் அதிகாரம் முன்னர் எப்போதும் இல்லாதளவுக்குப் பயன்படுத்தப்பட்டதாக தமிழ்த் தேசியக் கூட்டமைப்பு குற்றம் சாட்டியிருக்கின்றது.

அனைத்து வழிகளையும் பயன்படுத்தி இத்தேர்தலில் எப்படியும் வெற்றிபெற்றுவிட வேண்டும் என்பதில் அரசு உறுதியாக இருந்துள்ளது என தமிழ்த் தேசியக் கூட்டமைப்பின் யாழ். மாவட்ட நாடாளுமன்ற உறுப்பினர் என்.சிறீகாந்தா தெரிவித்திருக்கின்றார்.

"மக்களை வாக்களிக்கத் தூண்டுவதற்காகவும், அதற்காக அவர்களை அச்சுறுத்துவதற்காகவும் அரசு பல்வேறு உபாயங்களைக் கையாண்டதைக் காணக்கூடியதாக இருந்ததாக யாழ்ப்பாண வாக்காளர்கள் தெரிவிக்கின்றார்கள்" என இது தொடர்பாகக் கருத்து வெளியிட்ட சிறீகாந்தா மேலும் குறிப்பிட்டார்.

"இந்த வெற்றியையிட்டு அரசு பெரிதாகக் கூக்குரலிடுகின்றது. அவர்கள் எவ்வாறு வெற்றி பெற்றார்கள் என்பது எமக்குத் தெரியும். தடுத்துவைக்கப்பட்டுள்ள 3,00,000 மக்களையும் விடுதலை செய்த பின்னர் பொதுத் தேர்தல் ஒன்றை நடத்திப் பார்க்குமாறு அரசுக்கு நான் சவால் விடுகின்றேன்" எனவும் அழைப்பு விடுத்த சிறீகாந்தா, அப்போதுதான் எமது மக்கள் எங்கே உள்ளார்கள் என்பதை அறிந்துகொள்ளக் கூடியதாக இருக்கும் எனவும் குறிப்பிட்டார்.

இதேவேளையில், இத்தேர்தல் முடிவுகள் தொடர்பாகக் கருத்து வெளியிட்ட ஈ.பி.டி.பி.யின் தலைவரும் அமைச்சருமான டக்ளஸ் தேவானந்தா, யாழ். மாநகரசபைத் தேர்தலில் தமது கட்சியைச் சேர்ந்த ஒன்பது உறுப்பினர்கள் வெற்றி பெற்றிருக்கின்ற போதிலும், அதனையிட்டு தான் மகிழ்ச்சியடையவில்லை எனத் தெரிவித்திருக்கின்றார்.

யாழ். மாநகர சபைத் தேர்தலில் ஐக்கிய மக்கள் சுதந்திர முன்னணியின் வெற்றிலைச் சின்னத்தில் ஈ.பி.டி.பி.யைச் சேர்ந்த 20 பேர் நிறுத்தப்பட்டிருந்த போதிலும் ஒன்பது பேர் மட்டுமே விருப்பு வாக்குகளின் அடிப்படையில் வெற்றி பெற்றிருக்கின்றார்கள்.

தேர்தல் பிரச்சார நடவடிக்கைகளின் போது தம்மால் 17 ஆசனங்களை இலகுவாகப் பெற்றுக்கொள்ள முடியும் என டக்ளஸ் தேவானந்தா தெரிவித்துவந்த போதிலும், ஒன்பது ஆசனங்களை மட்டுமே பெற்றிருப்பதையிட்டு கருத்து வெளியிட்ட அவர், இத்தேர்தலில் தான் தோற்கடிக்கப்பட்டுவிட்டது போன்ற உணர்வைக் கொள்வதாகக் குறிப்பிட்டிருக்கின்றார்.
TNC

Last update : 10-08-2009 17:59

Average user rating

   (0 vote)