விடுதலைப் புலிகள் இயக்க போராளிகளை சிறிலங்கா இராணுவத்தினர் சுட்டுப் படுகொலை செய்யும் காட்சிகள் அடங்கிய காணொலிப் பதிவு ஆதாரபூர்வமானதே என்று சட்டத்துக்குப் புறம்பான படுகொலைகள் தொடர்பான ஐ.நாவின் சிறப்பு அறிக்கையாளர் பிலிப் அல்ஸ்ரன் [Philip Alston] ஐ.நா.வுக்கு அறிக்கை சமர்ப்பித்துள்ளார். நேற்று அவர் தனது விசாரணை அறிக்கையை வெளியிட்டார்.

“இந்த அறிக்கையில் அவர் பிரித்தானியாவின் சனல் 4 தொலைக்காட்சியில் ஒளிபரப்பான இந்தக் காட்சிகள் முற்றிலும் ஆதாரபூர்வானவை. இதுபற்றி மூன்று தனித்தனியான நிபுணர்கள் மூலம் இது பரிசோதிக்கப்பட்டது.

அவர்கள் இந்த காணொலி ஆதாரபூர்வமானது என்பதை உறுதி செய்துள்ளனர். எனவே இதுபற்றிய முழுமையான விசாரணைகள் நடத்தப்பட வேண்டும்” என்று அவர் குறிப்பிட்டார்.

அதேவேளை ஐ.நாவுக்கு பிலிப் அல்ஸ்ரன் அளித்துள்ள அறிக்கை குறித்து சிறிலங்கா அரசாங்கம் விசனம் வெளியிட்டுள்ளது.

அவர் இராஜதந்திர வழிமுறைகளை மீறிவிட்டாரென சிறிலங்கா வெளிவிவகார அமைச்சர் றோகித போகொல்லாகம குற்றம்சாட்டியுள்ளார்.

தம்முடன் கலந்தாலோசனை செய்யாமல் ஐ.நாவின் சட்டதிட்டங்களை மீறும் வகையில் இந்த அறிக்கையைப் பகிரங்கமாக வெளியிட்டிருப்பதாகவும் அவர் கூறியுள்ளார்.

அதேவேளை, சிறிலங்கா இறைமை மிக்க தனித்துவமான நாடு. எமது நாட்டைப்பற்றி தமக்குத் தேவையான விதத்தில் ஐக்கிய நாடுகள் சபை அறிக்கைகள் வெளியிட முடியாது.
 
அதனை நாம் வன்மையாக எதிர்க்கின்றோம் என சிறிலங்கா அதிபர் மகிந்த ராஜபக்ச தெரிவித்துள்ளார்.

எமது இராணுவத்தினர் நேர்மையானவர்கள். எவருக்கும் எப்படியும் பொய் சாட்சி கூறமுடியும். எனினும் எமது பிரச்சினையில் ஐக்கிய நாடுகள் சபை எம்முடன் கலந்துரையாடியே முடிவுகளை எடுக்க வேண்டும் எனவும் அதிபர் தெரிவித்தார்.

‘சனல் 4’ விவகாரம் தொடர்பாக ஐநா  வெளியிட முடிவு செய்த அறிக்கை தொடர்பாக நேற்று அம்பாந்தோட்டை மெதமுலானவில் இடம்பெற்ற நிகழ்வொன்றில் உரையாற்றிய போதே அவர் இவ்வாறு குறிப்பிட்ார்.

எமது இராணுவத்தினர். ஒழுக்கமுடையவர்கள், குற்றமிழைக்காதவர்கள். வெள்ளைக் கொடியுடன் சரணடைய வந்த எவரையும் அவர்கள் சுடவுமில்லை; சுடுவதற்குத் தயாராகவுமில்லை. இது எமது இராணுவத்திற் கெதிரான பெரும் அவதூறாகும் என்று மேலும் குறிப்பிட்டார்.

TNC

Last update : 09-01-2010 07:35

Average user rating

   (0 vote)