சென்னை, காவல்துறையைச் சேர்ந்த சப்-இன்ஸ்பெக்டர் உயிருக்கே பாதுகாப்பு இல்லை என்றால், நாட்டில் சட்டம், ஒழுங்கு இருக்கிறதா? என தே.மு.தி.க. தலைவர் விஜயகாந்த் கேள்வி எழுப்பியுள்ளார். திருநெல்வேலி மாவட்டம் ஆழ்வார்குறிச்சி அருகே போலீஸ் சப்-இன்ஸ்பெக்டர் வெற்றிவேல் வியாழக்கிழமை சமூக விரோதிகளால் வெட்டிப் படுகொலை செய்யப்பட்டார். சம்பவம் நடந்தபோது அந்த வழியாக அமைச்சர்களின் கார் வந்துள்ளது. சம்பவத்தை பார்த்த அமைச்சர்களின் பாதுகாவலர்கள் குற்றவாளிகளைப் பிடிக்க முயன்றுள்ளனர். ஆனால் அவர்கள் மீது அந்த சமூக விரோதிகள் வெடிகுண்டு போட்டுவிட்டு தப்பியுள்ளனர். மணல் கொள்ளையர்கள் மீது, கொலை செய்யப்பட்ட சப்-இன்ஸ்பெக்டர் வெற்றிவேல் கடுமையான நடவடிக்கை எடுத்ததாகக் கூறப்படுகிறது. இதனால் அவர் கொலை செய்யப்பட்டிருக்கலாம் என்றும், குடும்பத் தகராறில் சிக்கி நீதிமன்றத்தில் சாட்சி சொல்லிவிட்டு திரும்பிய சப்-இன்ஸ்பெக்டர் சிவசுப்பிரமணியம் என நினைத்து வெற்றிவேலை தவறாக கொலை செய்திருக்கலாம் என்றும் கூறப்படுகிறது.

மணல் கொள்ளை தடுப்பானாலும் சரி, நீதிமன்றத்தில் சாட்சி சொல்வதானாலும் சரி, சப்-இன்ஸ்பெக்டர்களைப் பொறுத்தவரை அரசு சார்பில் தங்களது கடமைகளை ஆற்றியுள்ளனர். கடமையைச் செய்த ஒரு அரசு அதிகாரி திட்டமிட்டு கொலை செய்யப்பட்டுள்ளார் என்பது இந்த சம்பவத்தின் மூலம் தெளிவாகிறது.

யாரையும், எந்த நேரத்திலும், எந்த இடத்திலும் கொலை செய்யலாம். கொலை செய்துவிட்டு தப்பித்துக் கொள்ளலாம், அமைச்சர்கள் வரும் வழி என்றாலும் கூட பயமில்லை என்கிற அளவுக்கு குற்றம் புரிந்தவர்கள் கருணாநிதி ஆட்சியில் நிம்மதியாக உலவுகிறார்கள். பட்டப்பகலில் வீடுகளிலும், பத்திரிகை அலுவலகங்களிலும், கட்சி மாறிச் சென்றவர்களையும் படுகொலை செய்தவர்கள், காவல்துறையின் மெத்தனத்தால், நீதிமன்றத்தால் விடுவிக்கப்பட்டு முழு சுதந்திரத்தோடு மக்களிடையே சுற்றிவருகின்றனர்.

அப்படியே சிறை சென்றாலும் தலைவர்களின் பிறந்தநாளை முன்னிட்டு தண்டனை குற்றவாளிகளை வெளியில் விடுவதற்கு தமிழக முதல்வர் தயாராக உள்ளார். குறைந்தபட்சம் இந்த காவல்துறை அதிகாரி கொலை வழக்கிலாவது முறையான விசாரணை செய்து குற்றவாளிகளுக்கு தண்டனை பெற்றுத்தர இந்த அரசு முன்வருமா? என்று விஜயகாந்த் வெள்ளிக்கிழமை விடுத்த அறிக்கையில் கேட்டுக்கொண்டுள்ளார்.

நன்றி : தினமணி
Video Courtesy : CNN-IBN

Last update : 09-01-2010 07:09

Average user rating

   (0 vote)